كيف شفت الضيعة? عن موقع مرمريتا

[ايلي]

بعتتلي حنان والله يعطيها العافة هاللينك لموقع مرمريتا لزورو وفعلاً انو بيستاهل فحبيت انشروا هون وشوف شو رأيكون فيه.


كيف شفت الضيعة?
د. اياد قحوش

انو بتبعتلي وبتسألني كيف شفت الضيعة? ياأبواسبر, ليش أنا شفت ضيعة ياأبواسبر ياحبيبي? أنا شفت مدينة , ومو حيالله مدينة, مدينة بتضيّعك?
انو بيوت فوق بيوت فوق بيوت وبالأخير طبّ زغيّر ..وعالم طاحشه عالطريق وماحدي بيفلت عن "بنط " قدام بيتو ..وشو ..البيشوف هالعمارات بيقول نيال صحابا ..



ويلّي ياعصاة اللّينه ,مافي حدي ..بيوت فاضيه , مافي حدي لاتندهي ..كل مين معو قرشين بيجي بينتع عمارة وبفرش نصا وبكب "نصا بالبحر" أجلّك يعني بقصد للبيع . وبيجوا هالغربتليي بيسترخصوا و"شب واشتهى" وهيك نص الضيعة من الضيعة ونص الضيعة مو من الضيعة ..وضايعة الطاسة ..حدي بيقلك اشبدي ..

http://www.marmarita.com/images/upload/store/Marmarmitavisit-6.jpg

واحزور شو ..حكيت مع الشباب منشان نطلع عالجبل , قالولي اطلب تكسي ومنطلع هلق ..ليك هالحكي ..ايلي..ياوال أمي ..تكسي ! قلتلهم لكم جبلكم ولي جبلي ..وطلعت أنا وعجيان حارتنا من عند طريق السلالم..وطول عالجبل ..حوشنا بلوط ومشينا من حد نبوعة زكي وبعدين كملنا عالسايح ومن هونيك مقاطعة عالصنوبر ..وهونيك سألت هالعجيان ايمت آخر مرة نصبوا طافوحة..

http://www.marmarita.com/images/upload/store/Marmarmitavisit-1.jpg

قام قللي واحد : أيشلا الطافوحة عمي اياد ..ايييييييه ..مابتعرف بالطافوحة ,ولك عمي أنو ?اذا جو الأمريكان لهون مارح يكون مركز انطلاق العمليات هوي عان زراق..
ومارح تكون المعركة الأولى اسما الطافوحة? ..صاروا يصهصنوا وفكروني مأمزح ..
ويابواسبر وحياة من سلمك بلشت نصب طوافيح ..وحفر بياش ..ونكشنا الصنوبر
كلو ندور ع سلول وقلتلهم ليكوا ولاه اذا صيدت هالطوافيح شي بتحسبوا حسابي
هاه ..

http://www.marmarita.com/images/upload/store/Marmarmitavisit-4.jpg

وهيك يابواسبر الضيعة ياخيي هيي تشم ريحة التنور من هون وتسمع بياع هندبه من هونيك ..الضيعة ياخيي هيي مو علب كبريت وكفتيريات وبس ..بدنا المعهن مصاري يعملوا مشاريع منشان هالشباب تبقى وتشتغل وتتزوج وتزدهر الضيعة ..
ومو عيبة نتم نقفقف تحت الشتي ونحنا عمنط من تحت بلكون لورا حاط ..العيبة
تسأل عن كل رفقات المدرسة وتتفاجئ انو معظمن صار برا ..

وبتسألني كيف شفت الضيعة يابواسبر ..ياخيي أنا بشم الضيعة شم.. وبسمعها كل يوم عمتعيطلنا وعمتعيط لهديك الأيام وقت كان الأول عسوريا من عنا ووقت كان عنا فريق طائرة بيشق الأرض ووقت كنا نحب بعضنا ونعرف بعضنا ..
ياخيي ماحدي بيعرف حدي بالضيعة ..
بس قللي الياس بتظبط وفؤاد خبرني انو نص مليون دولار بيرد الضيعة كلنكو ..واييييه قول انشالله ..
وبتهون
د. اياد قحوش - كندا

http://www.marmarita.com/images/upload/store/marmarita2005_1.jpg (http://www.marmarita.com/images/upload/store/marmarita2005.jpg)



يا حنان المغترب اذا اجا وعمل مشروع بيشكروه كام شب من الضيعة بس اذا عمر عمارة ونفش ريشو شوي بيحكو فيه تلات رباع العيل وكل الصبايا وبعدين بيبقى في عندو بيت فاضي بالضيعة وانتو بقى بتعرفو البيت الفاضي......................( تنضيفو سهل ما؟:evil_smil )

[Jack]

في شغلة مهمة كمان بتلفت النظر تغييرت بكل ضيعة... يمكن الدكتور إياد ما انتبهلها...

أنو من زمان كنت يا... ما تسمع شي غير صوت الهوى والشجر يا تسمع صوت حلو من شي راديو معتّ صوت فيروز يا وديع يا نصري... هلق صرت ما بتسمع غير دبج وهرج ومرج لملوك التراث المستحدث المقرف علي الديك ووفيق حبيب وزبانياتهم والذين تحتاج بعد سماع أصواتهم أن تضرب حالك ابرة ديكلون يا تاخد تحميلة كيتوفين ليكنّ وجع راسك... لأ والمشكلة أنو العالم مصدقين أنو هادا تراث سوريا... العمى العمى العمى تراث موسيقي حضاري عمرو 5000 سنة بيلخصولك ياه بالحاصوديه وخمس صبايا... أوف يا العمى ما عدنا سمعنا صوت الهوى ولك العمى أنو شو بيعجب العالم بهالضرب والضجة والنواح والصياح وصوت تعذيب أورغ الداعور الذي لا يمتّ لأي آلة موسيقية بشرية طبيعية بصلة... ولك العمى العمى العمىىىىىىىىىىىىى:angry: :angry: :angry: والله شي بيقهر وبيفقع.... أنا فقعت فقعت فقععععع.............. بوم:dead:

[Hanan]

والله يا جماعة كل شي تغير
نحنا والضيعة والبلد ... نفسيات الناس .. اهتماماتهم
الباقي هو الحب اللي بقلبنا لهالأرض هوالوحيد الثابت واللي ما بيتغير

ياجاك ... بيني وبينك بيمر عليي لحظات بدعي لالله تنقطع الكهربا شي شوي ... لنتأكد انو نحنا بالضيعة وبين الطبيعة وفي عصافير وفي نسمات عليلة
خليها لربك

العزيز ايلي ... خلي الله يطعمنا بيت صغير نعيش فيه ببلدنا .. ولما الواحد بدو يفكر بمشروع صغير اول شي بيفكر بضيعتو وبأهلها
لأن كلنا منعرف الظروف اللي عايشين فيها اهل الضيعة ... والمساعدة اللي بحاجتها

الله كريم ومنرجع ومنشتغل ... هدا واحد من أحلامي الكبيرة وباتمنى يتحقق

[bahhar]

يا الله عليكم ما حلاكن من بشر .....
انشاء الله يا رب بترجعي يا حنونة انت وعائلتك الكريمة ...وبتعيشو هون بين اهلكن وناسكن ... على سورية الغالية سورية المقدسة .....سورية الحضارة .....سورية جامعة العالم ......سورية الجرح النازف ...سورية فرحي وحزني ...عطشي وجوعي ....قلبي وعقلي ....سورية الغالية
ارفع يدي للسماء ابتهل لله أناشده المساعدة ليأخذ بيد الغائبين ليعودو الى وطنهم ليساعدو على نهضة بلدنا ... وليكونو قريبين منا .
انشاء الله بترجعي حنان عن قريب .

[Hanan]

خلينا نعتبرها ملحق للموضوع الأول

لأنها لاتقلّ روعة وواقعية عنه
ولكني أحسست أنها تحمل شوقاً أكبر .. شوق للماضي والأخوة والعائلة للطفولة التي لم تفارق مخيلة الكاتب : إياد قحوش


راجعين ياضيعتنا

د. اياد قحوش

وبعدين يابو اسبر بخمنلك الحياة شوي مره بس وقت منتذكرها بتصير حلوي ..مدري ليش وقت الكنت زغير كنت اتدايق انو أمشي كل يوم من بيتنا اللي هوي بطرف الضيعة لحتى وصل عالسهله أو عاماريوحنا ..



بس بهالمشوار يابواسبر
اشتقت كتير للهلمشوي وصرت كل يوم أمشيها شي تلات مرات ..ليك وقت وصلت عالمطار كانوا قرايبيني بانتظاري وقالولي ليش مابتنام الليله بالشام وبتطلع عالضيعة بكرا قلتلون ياعمي والله بحب الشام كتير بس ماني مسدق ايمت شوف الضيعة ..وشدينا بنص الليل ..وكنا عمنحكي طول الطريق بس وقت وصلت عمفرق الوادي سكتت وماعاد قدرت احكي ..كأنو انربط لساني وبلشت الدموع تشرّ ..
وصلت عالبيت وصرت روح من أوضة لأوضة وفتش بالخزانة وبالدروجه وبقبش هالتخوت والصوفايات ..رحت عالحمام وشفت الطاسه للي كانت تحممنا فيها ستي وكمان طلعت عالسقيفة شفت جلاءات الابتدائي والثانوي ..وشفت دفاتر التعبير تبعوتي وفي كيس سيف اسمو سيف العبد اساتو بمحلو ..وكمان فتحت هالصور وشفت ناس ماتت وناس مابعرف وين صارت ..ولقيت رسايل من الشاعر شوقي بغدادي ومن الأديب زياد محبك ومن غيرهم كتير ..وماقدرت نام للساعة سته الصبح ..وحوالي الساعة سبعة اتصل واحد من حبنمرة قللي شو متعمل ..
قلتلو نايم قام قللي جاي لعندك قلتلو لاء خليني نايم ومنزور بعضنا بالحلم ..متل المافهم عليي وبعد نص ساعة كان ميدقدق عالباب ..المهم صرت اتاوب قدامو عاقد ماالله عطاني عزم ..وبعدين عطانا عرض كتافو بس ماقدرت أرجع نام ..يابو اسبر صبحية الضيعة بتجنن عصافير وهدوء وبيجوز تسمع صوت جارك عميعيط عمرتو شوي بس حتى العيطة حلوي ..يلعن عرض بلادنا ماأحلاها ..
المهم قللي بيي شو مشتاق نعمل غدا قلتلو أي شي مافيه لحم ..قام قللي مجدرة قلتلو فليكن ..وهوي عميطبخ مجدرة اجانا ضيوف ..شمو ريحة المجدرة قام واحد قال هيك بعتناك دكتور تتخصص برا وشاعر وياهو وراجع تاكل مجدرة ..يعني قللي يابواسبر لوأني جقمتو شي كف لهالزلمي حدا بيلومني بشرفك ..? قلتلو مامعنا حق لحم وبعدين أنا مشتاق للبصل لأخضر وجاط لبن بلدي وقعده عالبرندا برا بتسوى عندي البيت الأبيض ..
وبعد ما شدينا بالجماعة ليبقوا عالغدا وماقبلوا قال رايحين يتغدوا بالفندق ..قلتلون
صحة والله معكون ..وماتقول بيي يمكن كان حاسب حسابن لأنو الطنجرة كانت معرمه تعريم ..وفرشلك طاولة ماصارت للسلطان عبد الحميد ..بس بلش يزق بهالصحون وبالملاعق وكان ميعد هيدا لاياد وهيدا لزياد وهيدا لرامي وهيدا ..هون
قاطعتو وقلتلو يابيي شومتعمل لشو كل هالصحون وهالملاعق ..قللي يابيي من عشربن سنه وقت كنتو زغار كانت الطبخة ماتكفيكن وماكان عنا كراسي تكفي لعشرة وتعودنا أنا وأمك ماناكل لحتى الكل يشبعوا ..وهلق كلكون طيرتوا وصرت لحالي هون ..فخلينا نتخيل أنو بعدكن هون ونحط صحون وملاعق عالعدد ..وقللي بيي ليش مفكر أنا فيني ابلع اللقمة اذا ماتخيلتكن معي ..وليك هاه ..وشال صور من جيبتو وحده للمرحوم عامر ووحده لأخواتي الكبار ووحده للصغار ..وقال هه ليكون كلن هون معي وهلق فينا نشكر الله وناكل ..
يابيي يابواسبر ..دبحني بيي دبح ..ياالله عهديك الأيام لمن كانت الصحون تقرقع والملاعق تضرب ببعضها وننزل هبش بالكرانيب وبالرشاد وبالفجل وننزل سفق بسلاطة اللبن بخيار ..ياالله شوكانت حلوي هديك الأيام يابو اسبر ..ماقلتلك الذكريات حلوي ..
قلتلو لبيي مابترجع معي بعد مابتخلص اجازتي يابيي ..اتطلع فيي وقللي التراب هون بخور يااياد وبتحس بطعمة السما لما بتشم ريحة الأرض ..يابيي يااياد سفرتكن واحد واحد وعلمتكون أعلى العلوم بس أمنيتي قبل ماموت أقدر رجعكون واحد واحد لهلبلاد ..
كاسك يابيي كاسك ..ومنرجع انشالله منرجع وبترجع الملاعق تدق ببعضها وبترجع الصحون تقرقع وناكل من طبخ أمي كلنا سوى ونشرب كاسك يابيي وكاس مرمريتا
والوادي وسوريا ..
أنا كتير مشتقلك يابيي ووحياتك عالغالي راجعين ..نحوش مشمش سوى ونكسر صنوبر ونلعب طرنيب وننام بعد الضهر ونتمشور سوى ونمسي عالجيران ..
راجعين ياضيعتنا ..بس بعد ماتعمل أمي العمليه وبتقوم بالسلامة انشالله

قلن يابواسبر لكل المغتربين يرجعوا ..حلها بقى ..انبح صوت الأرض وهيي تعيطلنا..
د: اياد قحوش - كندا


**************************

أتمنى أن تنال إعجابكم

http://www.marmarita.com/nuke/modules.php?name=News&file=article&sid=5025&mode=&order=0&thold=0 (http://www.marmarita.com/nuke/modules.php?name=News&file=article&sid=5025&mode=&order=0&thold=0)